મહેમદાવાદમાં અષાઢી બીજના દિવસે 12 મી રથયાત્રા નીકળશે,સપ્ત પોળમાં ભગવાન જગન્નાથજીનું મોસાળુ

મહેમદાવાદ વાત્રક નદીના કિનારે આવેલા સિદ્ધિવિનાયક મંદિર થી ઓપરેશન સિંદૂર થીમ આધારિત 21 કિલોમીટરની ભગવાન શ્રી જગન્નાથજીની ભવ્ય રથયાત્રા અષાઢી બીજને તા.27 જૂન ને શુક્રવારના રોજ સવારે 9:30 વાગ્યે પ્રસ્થાન થશે. આ અગાઉ સવારે 9:00 કલાકે રથયાત્રા ભ્રમણ પૂજા યોજાશે. આ રથયાત્રા નું સંચાલન 130 નિવૃત સૈનિકો દ્વારા કરવામાં આવશે.આ રથયાત્રાનું આયોજન ધર્મ રક્ષા સમિતિ અને સિદ્ધિવિનાયક સેવા સમિતિ દ્વારા કરવામાં આવ્યું છે. ઓપરેશન સિંદૂર થીમ આ રથયાત્રાને વિશેષ બનાવવામાં આવી છે. આ થીમ હેઠળ શાંતિ, ભક્તિ અને સમાજની એકતાનો સંદેશો ફેલાવશે. આ અંગે મંદિરના ટ્રસ્ટી નરેન્દ્રભાઇ પુરોહિતે જણાવ્યું હતુ કે રથયાત્રા સિદ્ધિવિનાયક મંદિર થી પ્રસ્થાન કરી ખાત્રજ ગામ, ખાત્રજ ચોકડી થઈને મહેમદાવાદ શહેરમાં પ્રવેશ કરશે.

મહેમદાવાદ શહેરની સપ્ત પોળમાં બપોરના 12:30 કલાકે તપન ઠક્કર દ્વારા મામા તરીકે ફરજ નિભાવી મોસાળાની વિધિ કરવામાં આવશે. ત્યાં વિધિ પૂર્ણ કર્યા બાદ રથયાત્રા પરંપરાગત રૂટ પરથી પસાર થઈને ફરી નીજ મંદિરે પરત ફરશે. આ રથયાત્રામાં હજારો શ્રદ્ધાળુઓ જોડાશે અને પ્રસાદ ગ્રહણ કરી ધન્યતા અનુભવશે. આ રથયાત્રામાં 43 ભજન મંડળી ભાગ લેશે. આ ઉપરાંત રથયાત્રામાં ગુજરાતી ફિલ્મ સ્ટાર-વિક્રમ ઠાકોર,ડાયરા કલાકાર હકાભા ગઢવી અને જસ્સી દાદી ગઢવી તેમજ તરણેતર રાસ મંડળ અને આદિવાસી લોક નૃત્યો ટીમલી મુખ્ય આકર્ષણ કેન્દ્ર બની રહેશે. આ રથયાત્રામાં મહેમદાવાદ 117 વિદ્યાનસભાના ધારાસભ્ય અર્જુનસિંહજી ચૌહાણ,સાંસદ દેવુસિંહ ચૌહાણ સહિતના અગ્રણીઓ ઉપસ્થિત રહેશે.